الاثنين، 24 مارس، 2008

السلام عليكم ورحمة الله

لاكثر من مرة قررت اني اعمل مدونة ليا اتكلم فيها عن اي حاجة احب اتكلم فيها ، رغم ان موهبة الكتابة عندي قلت جدا عن الاول ، وكنت فعلا بكريت البلوج ولكن بعد فترة انساه ويقل حماسي للكتابه

وكالعاده ، قررت اني اعمل البلوج ده ، ولكن اعتبرت اساسه هو الـ "ايجابيه"
فجأة في لحظة، عدت في بالي جملة "سيرى العالم اجمع" ، عجبتني... سبتلها الفرصة انها تدخل جوايا ، وتملأني ، واعيش في جوها ومودها ، جو التحدي والحرب... تحدي الجميع، ومحاربة كل السلبيات والضعف والهزيمة ، والتحدي باستبدال كل ده بحياة مليئة بالايجابية... يكفيني كلمة ان "احيا" ، مش عايز اكون " عايش" بس ، زيي زي باقي الناس ، لازم اعمل حاجة... لازم اثبت للعالم كله... مين انا

انا انسان عادي جدا ، لا احب الغرور نهائيا ، ولكن... في داخل كل واحد فينا صوت لازم يحسسه انه مختلف عن الاخرين، وان الناس بتقدره، وانه يقدر يعمل حاجة بتميزه عن الناس ، لا ارى ان ده غرور نهائيا، لكن الصوت ده لازم يكون عند كل واحد ... لان في الحقيقة كل واحد فعلا بيكون متميز جدا في حاجة معينة... حتى لو كان متميز جدا في انه يبقى "فاشل" ، متميز جدا في انه يبقى "سلبي" ، اتعلم فن النكد وانه يحبط نفسه بمنتهى المهارة والسهولة... والاحتراف.

انا عامل البلوج ده عشان اتكلم فيه عن كل اللي عايز اتكلم فيه ، كل شيء في كل شيء، واحيانا لمجرد التنفيس ، لهذا طبيعي انك تشوف بعض الرسائل عميقة جدا جدا وفي البعض الاخر من وجهه نظرك بسيطة ، وممكن قد لا تستحق انك تقراها ، بمعنى اخر ، هتفهم قصدي لما اقولك ان لو كان بايدي اخلي البلوج ده مخفي كنت عملت كده... احيانا هكتب لنفسي على اعتبار ان مفيش حد هيقراه ، ولو حد قراه مش هيفهم حاجة ، واحيانا هكتب على اساس ان الناس سمعاني وشايفه البلوج ده، بالتوازي مع رغبتي في التنفيس عن نفسي فقط

لكن لا تتردد لو كنت عايز تكلمني انك تبعتلي ميل او كومينت ، وانا هبقى سعيد جدا بكده

كان معكم... صاحب البلوج!

والسلام عليكم ورحمة الله وبركاته